منذ 6 أيام 2
صباح الخير... زي مابنعمل دايماً..هانحاول نقدملكم الوصفات بطريقة خفيفة وسريعة وصحية عشان نقلل الإحساس بالتقل والكسل بعد الأكل بذات في رمضان. هانجرب النهاردة طريقة "الخرشوف المحشي بالرز واللحمة المفرومة" الخرشوف من الخضروات المفيدة جدا مليان فيتامين C,A ومصدر للكالسيوم وبيقلل الكوليسترول. وكمان مليان حديد عشان كده لازم نعصر عليه لمون بعد مانقشّره. الفكرة النهاردة إننا هانحشي الخرشوف بخلطة شبة المحشي العادي بالرز واللحمة والخضرة. اول حاجة هانعمل كباية رز بالطريقة العادية ونسيبه على جنب.. (حسب كمية الخرشوف) وبعدين نعمل العصاج.. هانشوح بصلة كبيرة مكعبات في معلقة زيت زتون لحد ماتصفر وبعدين نحط نص كيلو لحمة مفرومة ونقلبها مع البصلة لحد مالونها يتغيّر ونرش عليها ملح وفلفل.. ونسيبها لحد ماتستوي بعدها نقفل النار ونقلب معاها كبشة كزبرة خضرا وبقدونس ورشة كمون وبابريكا وقرفة وكمان نقلبها مع الرز وكده تبقى خلطة الحشو جاهزة.. نجيب قلوب الخرشوف (المنقوعة في ميّه ولمون عشان ماتسودّش) وممكن نسلق الخرشوف نص سلقة قبل الحشو لو عايزين.. ونحشيها بالحشو ونرصها في قالب الفرن. ونغطيها بصلصة الطماطم الطازة.. عبارة عن.. نشوّح اربع فصوص توم في معلقة زيت زتون مع ملح وفلفل ولما يصفر نحط عليه كبايتين طماطم مبشورة مع معلقة صلصة ورشة بابريكا ومعلقة خل ونسيبهم عالنار لحد ماتتقل شوية وبعدين نغطي بيها الخرشوف وندخلها الفرن لحد مالخرشوف يستوي. الخرشوف المحشي ممكن ناكله مع محاشي مشكّلة او بطاطس محشية ومعاهم كفتة مشوية وسلطة خضرا او تبّولة وشوربة لسان عصفور. كل سنة وانتو طيبين.. ونهاركم سعيد :) #رمضان_2018 #فطار_سوكة
منذ 7 أيام 0
دي فراخ محمرة مقرمشة زي اللي بنشتريها جاهزة بعتتهالنا @Sara Sleem ..برافو عليكي سارة :) وطريقتها في خطوتين أهيه: "الطريقة: اول حاجه بنعمل طبقين واحد للتتبيلة وواحد للتغطية الطبق الاول: فيه دقيق .. ملح .. فلفل اسود .. بصل وتوم بودر .. رشة قرفة وجنزبيل .. شطه .. زعتر .. بابريكا .. كركم .. بيضة .. ومياه او لبن او زبادى زى ما انتوا عايزين وتقلبوا كل المكونات مع بعض لحد ماتعمل عجينه خفيفة زى الكيك كدة وتسيبوا الفراخ فيها وتكون الفرخة متقطعة 8 و متشال منها الجلد ونية مش مسلوقة و متغرزة بالسكينة علشان تستوى كويس ونسيبها ف التلاجه 4 ساعات عالأقل الطبق التاني: دقيق ناشف من غير لبن او مياه وعليه كل التوابل اللى حطيتوها عالتتبيلة بس من غير بيضة وزودوا عليها كيس بيكنج بودر و3 معالق نشا كبار قلبوهم كويس ونحطها في كيس بلاستيك علشان يبقى اسهل في التغليف نتطلع الفراخ من التتبيلة ونحطهاها في كيس الدقيق من غير ماتضغطوا عليها يعنى تقلبوها في الكيس لحد ماتتغلف كويس وننزلها في الزيت ويكون زيت غزير ونعلى النار الاول وبعدين نوطى عليها ونغطيها لحد ماتستوى" ناكلها مع تومية وبطاطس طبعا :) #شيف_لبكرة
منذ 9 أيام 3
صباح الخير... زي كل رمضان أول حاجة بتطلبوها هي "المقلوبة" وزي مابنعمل دايماً..هانحاول نقدملكم الوصفات بطريقة خفيفة وسريعة وصحية عشان نقلل الإحساس بالتقل والكسل بعد الأكل بذات في رمضان. هانجرب النهاردة طريقة المقلوبة بالفراخ. نحضّر.. فرخة مقطعة متبلة بملح وفلفل وبصل وطماطم ولمون.. 4كبايات رز.. 4وحدات طماطم تقريبا.. كيلو بتنجان.. راس قرنبيط (زهرة) متقطعة وردات.. 2بصلة كبيرة مقطعة شرايح متبلة بملح وفلفل.. ملح وفلفل.. رشة قرفة.. وبهارات وكركم. اول حاجة نقشر البتنجان ونقطعه شرايح ونرشّه ملح ونسيبه شوية ينزًل السوائل اللي فيه.. ودلوقت ندهن شرايح البتنجان ووردات القرنبيط بالزيت بالفُرشه ونحطهم في صينية على ورق زبدة وندخلهم الفرن يتحمرو تحت الشواية.. وبعدين نشوّح الفراخ بدون سلق في معلقتين زيت ونسيبها عالنار لحد ماتستوي تقريبا.. وجه وقت رص طبقات المقلوبة.. نقطع البصل والطماطم حلقات ونحطها في قاع الحلة وعليها طبقة رز وبعدين نرص الفراخ.. وعليها طبقة بصل متبل.. وعليهم نرص البتنجان.. بعدها نحط طبقة رز فوق البتننجان.. وبعدها طبقة قرنبيط... ونكرر الطبقات لحد الآخر.. لكن نسيب مسافه كافية قبل حرف الحلة.. نحط مقدار شوربة عليها الملح والفلفل والبهارات والكركم فوق الارز ونحطها عالنار ولما تغلي نغطيها ونهدي النار زي طريقة تسوية الرز العادية. وبعد ماتستوي المقلوبة نسيبها تهدى وبعدين نقلبها في صينية او طبق التقديم. المقلوبة تعتبر طبق رئيسي عالسفرة في أغلب العزومات وممكن نعمل معاها صينية فراخ..ناكلها مع سلطة الزبادي وسلطة الفتوش وطماطم متبّلة وطحينة وسلطات مشكلة ومعاهم شوربة فراخ بالكريمة. المقلوبة بتتعمل بطرق مختلفة حسب كل بلد طبعاً.. تعرفو الفرق مابين المقلوبة الفلسطينية والأردنية والسورية والعراقية والخليجية؟!! الأجانب ساعات بيسمّوها "upside down rice cake" :) كل سنة وانتو طيبين.. ونهاركم سعيد :) #رمضان_2018 #فطار_سوكة
12 مايو 2018 08:35 م 1
ده حمام محشي اللي ناس كتير دايما بتطلبه.. وممكن نعمله في عزومات رمضان.. بعتتهولنا @Mona El Sayed ..برافو عليكي منى :) وطريقتها في خطوتين أهيه: "الطريقة: بنغسل الحمام كويس جدا وننظفة وننقعة في مية وخل وليمون ودقيق.. نشطفة كويس جدا بعدها ونسيبه يصفي شوية.. ونكون مجهزين رز مغسول ومنقوع نشوّح الرز في معلقة سمن يلدي ونقلبه لحد ما يتشوح شوية .. ننزل بالكبد والقوانص متقطعة قطع صغيرة ومحط عليهم مرقة البصل وهي عبارة عم بصل مقروك بالملح والفلفل وننزل بخلطة البهارات المميزة جدا عبارة عن.. (رشة بهارات لحمة ورشة كاري صغيرة اوي ورشة جنزبيل ورشة قرفة ورشة كبة صيني مطحونة وكزبرة ناشفة وممكن رشة حبهان مطحون) ونقلب كل دا على النار ونهدي النار ونسيبها تستوي شوية اما تبرد خلطة الحشو.. نحشي الحمام ونقفله كوبس وننزل بيه في مية مغلية وفيها ورق لورا وحبهان وبصلة.. ولما تغلي نوطي النار خالص.. ولما تستوي نحمره في معلقة سمنه وزيت" قولولنا بتعملو الحمام المحشي إزاي؟!.. وهل الطريقة بتفرق من بلد وبلد؟!!
Copyright resarved @ ISDEgypt.com