29 أكتوبر 2018 11:00 ص 0
صباح الخير... اول مالدنيا برّدت.. روحت اشتريت بطاطا طبعا وشويتها في البيت.. بس الأولاد قالولي عايزين البطاطا بتاعة العربية اللي في الشارع برضو!! مع إن والله كان طعمها حلو زي العربية بالضبط!!.. ودلوقت بقى عندي بطاطا مشوية في التلاجة محتارة اعمل بيها إيه!.. ولّا أكلها كلها لوحدي؟! :) .. بس لقيتلها فكرة حلوة وسريعة.. والأولاد هايحبّوها! هانجيب.. كباية بطاطا مشوية مهروسة موزة مهروسة كباية شوفان ربع او نص كباية دقيق ربع كباية عسل او حسب الرغبة رشة قرفة وجنزبيل لو عايزين مكسرات مفرومة لو عايزين نخلط كل ده مع بعض لحد مايبقى متماسك.. نقسّم الخليط كور متوسطة ونضغطها شوية عشان تبقى "مبطّطة" ونحطّها في صينية على ورق زبدة وندخلها فرن سخن لمدة 20 دقيقة على حرارة 170 وبعدها نطلّعها تبرد لمدة نص ساعة. الأولاد حبّوها جداً.. وبياخدوها معاهم المدرسة.. تعتبر snack مفيدة وصحية أنا بافطر بيها الصبح. قولولي أفكار تانية للبطاطا بتعملوها في البيت. نهاركم سعيد :)
23 أكتوبر 2018 02:00 م 2
أول الأسبوع قولنا على انواع البهارات وشوفنا كل بلد بهاراتها إيه.. ناس كتير بعتولنا بيسألو على الخلطة السرية لأكلات الfast food اللي بناكلها بره البيت.. منها خلطة بهارات الفراخ المقلية المشهورة اللي قولنا إمبارح. ومن الحاجات اللي كلّنا بنحبها في المطاعم.. هي البطاطس المحمرة بالبهارات الأولاد بيطلبوها علطول.. مش كده؟! :) البطاطس ممكن نقطعها صوابع بالطريقة العادية.. أو ممكن نجيب البطاطس الصغيرة ونقطعها نصّين او أرباع.. وممكن نحط البطاطس في صينية على ورق زبدة ونرشّها زيت وندخلها الفرن تستوي.. (طريقة الفرن دي أحسن مانحمّرها في الزيت) وفي وقت تسوية البطاطس في الفرن.. تعالو نعمل خلطة البهارات.. فصين توم مفروم.. بقدونس مفروم.. معلقتين زعتر.. معلقة روزماري.. نص معلقة كمّون.. معلقة بابريكا.. نص معلقة بودرة بصل.. ملح وفلفل. هانخلط كل المكونات دي ونرشّها عالبطاطس أول ماتطلع من الفرن وهي سخنة.. ونقلبها عشان البهات تغطيها كلها.. وخلااااص. ممكن ناكلها مع مستردة أو صوص طماطم او لوحدها. جرّبو الخلطة دي وقولولنا طعمها زي البطاطس الجاهزة ولا لأ.. ولو عندكم خلطة بهارات سرية إبعتوهالنا. ولسّه بقية الأسبوع هانقول على وصفات تانية بنحبّها عشان سر الخلطة. نهاركم سعيد :)
22 أكتوبر 2018 02:00 م 3
بعد ماقولنا إمبارح على انواع البهارات وشوفنا كل بلد بهاراتها إيه.. ناس كتير بعتولنا بيسألو على الخلطة السرية لأكلات الfast food اللي بناكلها بره البيت.. وخصوصاً خلطة بهارات الفراخ المقلية المشهورة.. طبعا خلطة الفراخ دي هي "خلطة سرية" يعني موجودة في مكان محدش يعرفه وبيستعملوها في المطاعم بدون ماحد يعرف مكوناتها لأن الخلطة دي بفلوس كتير أوي.. بجد والله.. سر الخلطة ده سر حربي!! :) لكن فيه ناس إجتهدوا وعملو خلطة شبهها في الطعم ونزلو مكوناتها أونلاين عشان الناس تعرفها.. عبارة عن.. كبايتين دقيق وعليهم.. معلقة صغيرة أوريجانو معلقة صغيرة بودرة فلفل حار معلقة صغيرة ميرميّه معلقة صغيرة بردقوش معلقة صغيرة فلفل اسود معلقتين صغيرة ملح معلقتين صغيرة بابريكا معلقة صغيرة بودرة بصل معلقة صغيرة بودرة توم معلقة صغيرة بابريكا نخلط كل ده مع بعض ونحطهم عالدقيق نتبّل قطع الفراخ في البيض وملح وفلفل ومستردة ولبن رايب ونسيبها في التلاجة يوم بعدها نغلقها بخلطة الدقيق والبهارات وندخلها التلاجة لمدة ساعة وبعدها نحمرها في زيت غزير ونطلعها تتصفى على مناديل مطبخ. جرّبو الخلطة دي وقولولنا نفس طعم الفراخ الجاهزة ولا لأ.. ولو عندكم خلطة سرية للفراخ إبعتوهالنا. ولسّه بقية الأسبوع هانقول على وصفات تانية بنحبّها عشان سر الخلطة. نهاركم سعيد :)
21 أكتوبر 2018 02:09 م 2
أوقات كتير بيبقى عندنا مكونات الأكل وبنحتار نعمله بأي طريقة.. يعني احنا ممكن نعمل الرز بطريقة مصري او بطريقة أسباني.. أو بطريقة خليجية.. او بطريقة آسيوية.. من الحاجات الأساسية الي بتفرق كل مطبخ عن التاني.. طبعاً الطريقة نفسها.. وكمان أكيد "البهارات" البهارات كلهم تقريبا 17 -20 نوع بهار.. لكن إختيارنا للبهارات نحط إيه مع إيه هو اللي بيفرق في طعم مطبخ للتاني. يعني.. لو هانعمل أكله "إيطالي".. هانستعمل "ريحان -بودرة توم -بودرة بصل -أوريجانو -بقدونس" والمطبخ "الهندي" مليان بهارات.. نستعمل "ورق لاورا -حبهان -جنزبيل -قرفة -كمون -كركم -كاري -كزبرة -جوزة الطيب -بودرة توم -مستردة -شطة" والمطبخ "المكسيكي" الحراق.. نستعمل "كزبرة -كمون -شطة -اوريجانو -قرفة -بودرة توم -بابريكا" والمطبخ "الصيني".. نستعمل "شمر -بودرة توم -جنزبيل -قرنفل -شطة -عشبة لمون" والمطبخ "التايلاندي".. نستعمل "ريحان -كمون -حبهان -بودرة توم -كركم -كاري -جنزبيل" والمطبخ "البحر المتوسط".. نستعمل "ورق لاورا -أوريجانو -روزماري -زعتر -حبهان -جنزبيل -قرفة -قرنفل -كزبرة -ريحان" دي إختيارات البهارات في كل مطبخ بشكل عام.. ممكن تزيد أو تقل حسب الأكلة أو الوصفة نفسها. إيه أكتر مطبخ او خلطة بهارات بتحبوها في كل ده؟! نهاركم سعيد :)
Copyright resarved @ ISDEgypt.com